ഗ്രന്ഥപ്പുര - കേരളവുമായി ബന്ധപ്പെട്ട പൊതുസഞ്ചയരേഖകളുടെ ശേഖരം

 

പ്രിയരെ

ഗ്രന്ഥപ്പുര (https://shijualex.in/) എന്ന തൻ്റെ സൈറ്റിൽ കൂടെ ഷിജു അലക്സ് കഴിഞ്ഞ ഒരു പതിറ്റാണ്ടിനു മേലായി നടത്തി വന്നിരുന്ന ഡിജിറ്റൈസേഷൻ പ്രവർത്തനത്തെ പറ്റി അറിവുള്ളവരാണ ല്ലോ നമ്മളെല്ലാം . ഈ ഫേസ് ബുക്ക് ഗ്രൂപ്പിൽ നിങ്ങളൊക്കെ അംഗങ്ങളായി ചേർന്നത് ആ പദ്ധതിയുടെ പ്രാധാന്യം അറിയുന്നത് കൊണ്ടും ആ രേഖകൾ ഏതെങ്കിലും തരത്തിൽ ഉപകാരപ്പെടും എന്നുള്ളത് കൊണ്ടും അല്ലെങ്കിൽ ഈ പുരാതന രേഖകൾ വരും തലമുറയ്ക്ക് ഉപകാരപ്പെടുന്ന രീതിയിൽ സംരക്ഷിക്കപ്പെടണം എന്ന ആഗ്രഹം ഉള്ളത് കൊണ്ടും ആണല്ലോ.

എന്നാൽ 2021 ഡിസംബർ 16 ന് ഈ പോസ്റ്റിൽ സൂചിപ്പിച്ചിരിക്കുന്ന https://shijualex.in/kerala-documents-digitization.../ വിവിധ കാരണങ്ങൾ കൊണ്ട് കേരള രേഖകളുടെ ഡിജിറ്റൈസേഷനും അവയുടെ പൊതുവായ പ്രദർശനവും എന്ന പദ്ധതി തൽക്കാലം നിർത്തുന്നതായി ഷിജു അറിയിക്കുക ഉണ്ടായി. അതിനു അദ്ദേഹം നിരവധി കാരണങ്ങൾ പോസ്റ്റിൽ സൂചിപ്പിച്ചിട്ടുണ്ട്. ആ കാരണങ്ങൾ എല്ലാം തന്നെ ഷിജുവിന്റെ പ്രവര്ത്തികൾ വളരെ അടുത്ത് നിന്ന് കണ്ട ഒരാൾ എന്ന നിലയിൽ വളരെ ഗൌരവം ഉള്ളതാണെന്ന് ഞാൻ ഉറച്ചു വിശ്വസിക്കുകയും ഷിജു എടുത്ത തീരുമാനത്തെ പൂർണ്ണമായി മാനിക്കുകയും ചെയ്യുന്നു .നിങ്ങളിൽ പലരും അതേ രീതിയിൽ കാര്യങ്ങൾ മനസിലാക്കിയിട്ടുണ്ട് എന്ന് ഈ പോസ്റ്റിൽ (https://www.facebook.com/groups/grandappura/posts/1772237689632362/) വന്ന കമെൻ്റുകൾ സൂചിപ്പിക്കുന്നു.

ഇത്തരം ഒരു പദ്ധതി നിലനിന്നു പോകേണ്ടതിൻ്റെ ആവശ്യം അറിഞ്ഞു കൊണ്ടു തന്നെയാണ് ഞങ്ങൾ കുറച്ചു പേർ (https://shijualex.in/credits/) ഭാഗികമായെങ്കിലും ഷിജുവിനെ കഴിഞ്ഞ കാലങ്ങളിൽ വിവിധ രീതിയിൽ പിന്തുണച്ചത്. എന്നാൽ ഇപ്പോൾ ഷിജുവിൻ്റെ സന്നദ്ധപ്രവർത്തനം അവസാനിച്ചതോടെ ഈ പദ്ധതി അതിൻ്റെ സ്വാഭാവിക മരണത്തിലേക്ക് അടുത്ത് കൊണ്ടിരിക്കുകയാണ്. അത് വളരെ സങ്കടകരവും അടുത്ത തലമുറയോട് നമ്മൾ ചെയ്യുന്ന വലിയ ഒരു അനിതീയും ആയിരിക്കുമത്.

ഷിജു തൻ്റെ വിടവാങ്ങൽ പോസ്റ്റ് ഇട്ടതിനു ശെഷം ധാരാളം പേർ സ്വകാര്യമായി മെയിലുകൾ വഴിയും ഫോൺ വഴിയും സോഷ്യൽ മീഡിയ വഴിയും ഷിജുവിനെ ബന്ധപ്പെട്ട് ഈ പദ്ധതി തുടർന്ന് കൊണ്ട് പോകാൻ പ്രേരിപ്പിക്കുകയും അതിന് വേണ്ട സഹായങ്ങൾ തരാം എന്നു പറയുകയും ചെയ്യുകയുണ്ടായി . ചിലർ പബ്ലിക്കായി പോസ്റ്റുകളും എഴുതിയിരുന്നു. അതിനെ പറ്റി ഷിജു ഈ അടുത്ത കാലത്ത് എഴുതിയ പോസ്റ്റ് ഇവിടെ കാണാം https://www.facebook.com/shijualexonline/posts/10157832610212255

മുകളിലെ പോസ്റ്റിൽ സൂചിപ്പിച്ച പോലെ ബാംഗ്ലൂരിലുള്ള ഷിജുവിൻ്റെ ഞാനടക്കമുള്ള ചില സുഹൃത്തുക്കൾ, "കേരള രേഖകളുടെ ഡിജിറ്റൈസേഷനും അവയുടെ പൊതുവായ പ്രദർശനവും" എന്ന പദ്ധതി പുനർജീവിപ്പിക്കാൻ ശ്രമിക്കുന്നു. ഷിജുവിനെ ഇനി കൂടുതൽ ബുദ്ധിമുട്ടിക്കാതെ എന്നാൽ ഇത്രനാളത്തെ ഷിജുവിൻ്റെ പ്രവർത്തന പരിചയത്തെ ഉപയോഗിച്ചു കൊണ്ട് ഒരു പബ്ലിക്ക് പ്രൊജക്ട് ആയി മുൻപോട്ട് പോകാനാണ് ഞങ്ങൾ നോക്കുന്നത്. എന്നാൽ അതിനു സമൂഹത്തിൻ്റെ വിവിധതലങ്ങളിൽ പ്രവർത്തിക്കുന്നവരുടെ സഹകരണം ആവശ്യമാണ്. ഇത്തരം ഒരു പൊതു പദ്ധതിയിൽ ഞങ്ങളുമായി സാമ്പത്തികമായും സാങ്കേതികമായും സഹകരിക്കാൻ താല്പര്യമുള്ള ആളുകൾ ദയവായി jissojose@gmail.com എന്ന എൻ്റെ ഇമെയിൽ വിലാസത്തിലേക്ക് ഒരു മെയിൽ അയക്കാമോ?

Shiju Alex — with Shiju Alex.